Si m te, m ta… 

 Si m te Desalin,
M ta libere Ayiti ankò
Si m te Tousen,
M ta reekri
Istwa d Ayiti
Si m te wa Kristòf,
M ta rebati
Ayiti
Si m te Kapwalamò
M ta tonbe m leve
Epi m kontinye ap galope
Si m te Chalmayperal,
M ta fyè
M ta kontinye mache bwòdè
M ta tankou yon zetwal
K ap briye
Kote ki pa klere
M ta mache chalmayperalteman
Ak kè kontan
San m pa pantan
Malgre tout touman
Tout vye pikan.
Si m te ka rekolonize Ayiti,
M ta fè l tounen yon paradi.
M ta simen plan lanmou
Toupatou
M ta fè pepinyè lanmou
Pou al plante
Lòt kote.
Si m te ka rekolonize Ayiti,
M ta repran fyète
Desalin ak Tousen te pote
Zòt t ap respekte m
Li pa ta meprize m.
Si m te chèfseksyon
Nan yon seksyon,
M ta aji byen ak peyizan
Epi tout t ap kontan.
Si m te militè,
M ta mache tèt anlè
Pèp la pa t ap wè m kòm ènmi
Men yon zanmi
K ap pwoteje l
Ki p ap tire l.
Si m te ka reekri
Istwa d Ayiti,
Ala pawòl mwen ta di!

 

@David Nelson