Lavoum pou yo !

 

  Ala mechan lidè n yo mechan!
yo pa respekte modòd zansèt yo

Ala sousou lidè n yo sousou!
y ap respekte modòd zòt
pou kontinye toupizi yon pèp inosan
k ap soufri depi digdantan

Ala vòlè lidè n yo vòlè!
yo plen sak bidòl lajounen kou sole kouche
pou al sere aletranje
pandan pèp la ap tribiche anba Lavichè
k ap fè malere moute Mòn Fòfyèl pa do

Ala blofè lidè n yo blofè!
yo fè n tout kalte pwomès
pou eseye monte sou chèz boure a
pou al dodomeya

Ala kout memwa lidè n yo kout!
yo manje manje bliye
kou yo fin monte sou pouvwa
yo di pèp la pran nan twa wa
Ala sanpidè lidè n yo sanpidè!
yo pa fè anyen pou libere
peyizan ayisyen ki esklav nan batèy,
yo pa fè anyen pou zòt sispann lage chen
dèyè Ayisyen

Ala mechan lidè n yo mechan
lè yo kontinye kite pèp la grangou, analfabèt
epoutan l pa bèt!

Ala kote gen lidè blofè sou latè,
lidè k merite vekse an laten:
lavoum, alolavoum
pou tout sa k met peyi a nan tyouboum!

 

 

@David Nelson