LONBRAJ

NAN TOUT MOUN MWEN KONNEN MOUN SA PA JANM LAGE'M

MINM LEW LANWIT KOU LA JOUNEN  LI TOUJOU LA LAP GADE'M

LEW MALFEKTE VIN KASEW KOU MWEN YON SEL KOUDEY MWEN RANJE KOZEW'M

ZANMI SA PA KONNEN BAY MANTI PASKEW SE MWEN LAP PWOTEJE

KELKESWA KOTE  MWEN PASE   BON ZANMI SA TOUJOU LA

BAGAY KI PI ANRAJE YA ZANMI SA PA NAN GRIYIN DAN AK VAGABON

LEW YON MOUN VIN MANDEW POU MWEN MIN SE LI KI REPON'N

FANMI AK ZANMI MET LAGE SA MIN JENERAL SA PA FEW KITA NAGO

AVEK KEW POZE MWEN DOMI PASKE PA GIN MOUN KAP VINI PRAN PIYAY.



DAVID NELSON
08/26/2015

Pa lage sa

Dèfwa menm si nan lavi ou
Tout wout bare fò w pa kanpe
Chak moun gen yon jou pou
wòch lavi l woule fò kwè ou destine
Pa koute moun ki di w pap janm anyen
Paske w se malere
Gen anpil moun ki pa janm
Kwè nan sa ki rele destine
Solèy Bondye klere pou tout moun oh
Fò pa lage
Menm si devan w tout wout bare oh                                           
Pèsevere
Pa kite moun trete w de enferyè
Paske w pa gen yon dola
Respè w ak diyite w
Pi siperyè pase milyon dola
Pa bliye lafwa w se zam
Pou goumen ak lavia
Pa pèdi sanfwa w menm lè

Pwòp fanmi w vle chanje sa a.

Dèfwa ou konn leve nan kay la

Nan pye w timoun ap kriye

Pou ou sa w’ap pase se yon tray la

Ni w pa gen lòt pòt pou ou frape

Ou anvi kouri

Men w pa gen destinatyon

Ou anvi vag lavi

Men w gen twòp okipasyon

Dèfwa ou oblije reziye w ak sa lavia pote

Menm si tout moun ap imilye w

Pa bliye pran kwa w pote

Fò pa kriye la

Fò pa lage sa

Depi w’ap viv fò gen lespwa

Sa ka chanje la

Fò pa kriye la
Fò pa lage sa
Depi w’ap viv fò gen lespwa
Sa ka chanje la

 

 

 

NOU SE AYISYEN

Se nan solèy la mwen benyen

Lè mwen leve lè maten

Nan lawouze m badijonnen

Mwen fyè ke m se Ayisyen

Rasin mwen plante an Afrik

Yo te mennen ladan kou tibourik

Men zansèt mwen te lite Pou banm libète ak fyète

Frè m ak sè m pinga n reziye n

An nou chèche konn kisa k bloke n

Se vre chenn lan te soti nan pye n

Men nou toujou esklav nan panse n.

Pran almanak ann chèch'on dat

Nou bezwen yon lòt milwisankat

Zansèt nou yo te fè li deja

Li nesesè pou n refè l jodi a!

 

 

Yo kolonize n plizyè fwa

Sou yo nou toujou jwenn viktwa

Nou se yon pèp ki gen listwa

Nou se yon pakèt grenn ak bwa.

Lè pitit mwen mande m papa Kiyès mwen ye?

Mwen gade li nan je Ak ponyet mwen konsantre

Mwen di l, "Cherie se Ayisyen w ye!"

Frè m ak sè m pinga n reziye n!

An nou chèche konn kisa k bloke n!

Se vre chenn lan te soti nan pye n

Men nou toujou esklav nan panse n.

Pran almanak ann chèch'on dat!

Nou bezwen yon lòt milwisankat

! Zansèt nou yo te fè li deja! Li nesesè pou n refè l jodi a!

Pou Lavi Fleri

Gen pwovèb ki fèt pou chanje 

Kat je kontre manti vole 

Kòm si sa pat janm ekziste 

Lawont sa son w mantalite 

Itilize pa odasye 

Menm si l konnen sa pap mache 

Kounye a tout bagay chanje 

Pa gen pyès moun ki je pete 

Sa fè nèg mande anraje 

L anplwaye vye mo chat bare 

Si w kanpe ou di se pa vre 

Ou te gen tan yon kat make 

Mesye k ap lite yo pou lavi fleri 

Pou soufrans ka mouri 

Pou ti moun yo ka jwi 

Bèl demen kap grandi 

Woy pinga nou sezi 

N ap lite tout lavi 

Kont tout vye dan pouri 

Ki kwè n sa bannann mi 

E byen kòm yo klase nou youn kote 

An n pran wòl nou ak volonte 

Nou pap la pou nou betize 

Nou pap tann lè bagay mele 

Nou pap lide sou fèy papye 

Apre yon eleksyon manke 

Nou pap fè de lane pase 

Youn rèv tout yon etènite 

Oun jan pou kòz la avanse 

Si gen lan nou k te betize 

Ki fè jodi kòz la byeze 

Piblikman di jan sa pase 

Manno Charlemagne

     
      BAY AYITI    LAVI

Gen sa ki sèmante devan Bondye yo p’ap viv lòt kote 
Gen sa k di kote lonbrit yo mare se la y’ap fè vye zo 
Se la y’ap rete 
Gen se van lamizè k pouse do yo, yo tonbe lòt bò dlo 
Men gen sa k byen ki pa janm manke anyen mezanmi 
Kidnapè, chimè fè yo pè, yo kouri 

Gen sa k di se pitit Kapwa yo ye, yo se brave danje 
Gen sa k kraponnen k ta renmen chape 
Sa k san viza vwayaje nan bwa fouye 
Gen sa k deside tout bon pran lari, 
Yo p’ap pè malfini 
Poutan chaje lidè nan salon k’ap reflechi 
Pa gen peyi si nou pa kanpe pou li 

Chak grenn Ayisyen s’on poto mitan k’ap soutni tonèl devlopman 
Li konn Ayiti paka fè anyen 
Se Ayisyen ki pou met men nan men 
Ak sa k’ap viv byen lwen pou bati Ayiti 

Peyi nou se Ayiti, se nou ki pou fè pou li 
Mezanmi an n reyini pou nou ka ba li lavi 

Sa n’ap tann pou n met tèt ansanm 
Di m kisa n’ap tann 
Pa rete tan pou n chita tann 
Mezanmi mwen di n 

Peyi nou se Ayiti, se nou ki pou fè pou li 
Mezanmi an n reyini pou nou ka ba li lavi 

Beethova Obas — Emmanuel Obas